Volver ao contido

Publicador de contidos

Volver á páxina Índice
Atrás

A CONSELLERÍA DO MAR INVISTE 365.000 EUROS NA REPARACIÓN DOS DANOS PROVOCADOS POLO TEMPORAL NO PEIRAO DE CORME, EN PONTECESO

Portos de Galicia rematará nos vindeiros días as obras de emerxencia no dique e escolleira, que sufriran derrubes parciais debido ao impacto das ondas.

Santiago, 3 de maio de 2017.- A Consellería do Mar vén de investir 365.000 euros na reparación dos danos provocados no porto de Corme, no municipio coruñés de Ponteceso polo temporal da primeira fin de semana de febreiro. A titular do departamento da Xunta, Rosa Quintana, visitou esta mañá os traballos, acompañada polo presidente de Portos de Galicia, organismo que se encarga da execución das obras. 

A actuación de reparación dos danos veuse realizando durante os últimos dous meses logo de que as obras fosen tramitadas por procedemento de emerxencia, aprobado polo Consello da Xunta, ante a urxencia da actuación para minimizar situacións de risco para os usuarios do porto e o global da cidadanía. Os traballos céntranse na reparación da escolleira e dique de abrigo do porto cormelán, que sufriran derrubes parciais debido ao impacto das ondas.

As obras consisten fundamentalmente na reparación e reforzo do dique mediante bloques de formigón de 15 toneladas e escolleiras de pedra natural de 12 toneladas. Estas pezas están a ser colocadas nestes días por medio dunha grúa para a reconstrución do espaldón do dique. Os bloques foron fabricados fora do porto e coa súa colocación no peirao durante esta semana quedarán rematadas as obras. 

Durante a súa visita, Quintana explicou que os traballos devolverán a estrutura danada ás súas condicións habituais, devolvendo a seguridade e operatividade ao porto. Engadiu tamén que esta é unha das obras máis destacadas, xunto coa do porto da Guarda, das requeridas tralos danos do temporal que supuxeron un investimento total de 1,4 millóns de euros.