Saltar al contenido

Publicador de contenidos

Atrás

PORTOS DE GALICIA REPARA OS DANOS DOS ÚLTIMOS TEMPORAIS NO PEIRAO DE MERA, EN OLEIROS

  • A Consellería do Mar propón ao alcalde iniciar a tramitación para o cambio de titularidade dos terreos portuarios

 

Santiago de Compostela, 7 de marzo de 2021.- A Consellería do Mar, a través de Portos de Galicia, vén de iniciar as obras de reparación dos danos ocasionados polos últimos temporais no peirao de Mera, no concello de Oleiros. Así llo trasladou a titular do departamento autonómico, Rosa Quintana, esta mañá ao alcalde do municipio coruñés nunha reunión de traballo mantida na sede da Xunta.

Rosa Quintana, que estivo acompañada pola presidenta de Portos de Galicia, Susana Lenguas, explicou que os traballos deron comezo a finais da semana pasada e que se prolongarán durante os vindeiros días. As obras consisten fundamentalmente no  arrexuntado das pedras que conforman a rampla do peirao e que quedaran soltas pola perda do morteiro debido ao impacto das inclemencias meteorolóxicas.

Ademais, a titular de Mar trasladou ao rexedor que Portos de Galicia ten finalizado xa as obras de reparación das varandas de seguridade do peirao de Santa Cruz, tamén no concello de Oleiros.

Finalmente, no encontro, a Consellería do Mar propuxo ao Concello a posibilidade de iniciar a tramitación da reversión da titularidade das zonas portuarias de Santa Cruz e Mera ao Goberno do Estado para que o Executivo central as transfira ao Concello de Oleiros. Para esta fin, a Administración local deberá remitir a Portos de Galicia un documento de solicitude para poder iniciar o procedemento.