• O Consello do Executivo galego aprobou o traslado do expediente ao Ministerio de Transición Ecolóxica dando así por rematados os trámites de competencia autonómica no procedemento de  devolución ao Estado da titularidade de solo que rexistra uso público veciñal para que se transfira, no seu caso, aos Concellos.
• Os 10 portos beneficiarios son A Guarda, A Pobra do Caramiñal, Bueu, Cambados, Cangas,  Corme, Foz, Ponteceso, Santa Cruz de Oleiros e Vilanova de Arousa.
• Rematada a tramitación respecto dos portos incluídos na primeira fase segundo acordo coa Fegamp, Portos de Galicia segue a traballar para consensuar a delimitación do solo que reclaman outros concellos e replicar o procedemento.

Santiago de Compostela, 7 de maio de 2025.- A Xunta de Galicia, a través da Consellería de Facenda, remitiu aos servizos provinciais de Costas do Estado na Coruña, Pontevedra e Lugo, dependentes do Ministerio de Transición Ecolóxica, a autorización de reversión parcial dos terreos de dominio público portuario que non rexistran apenas actividade portuaria en nove municipios. Esta acordo foi aprobado previamente no Consello da Xunta e supón o cumprimento do último trámite autonómico necesario para a reversión dos terreos á Administración Xeral do Estado de xeito que esta poida transferilos aos concellos interesados en asumir a titularidade deste solo de uso público veciñal.

A autorización baséase na declaración de innecesariedade referida a terreos portuarios dos municipios de A Guarda, Bueu, Cambados Cangas, Foz, A Pobra do Caramiñal, Ponteceso (portos de Ponteceso e Corme), Oleiros (porto de Santa Cruz) e Vilanova de Arousa. Para delimitar o solo que se propón reverter ao Estado, Portos de Galicia consensuou con todos os alcaldes dos concellos afectados a proposta en base a criterios estritamente técnicos que foran previamente acordados coa Fegamp. Unha vez pechados os acordos eleváronse ao Consello reitor de Portos de Galicia que o aprobou por unanimidade.

Coa remisión ao Goberno central deste acordo a Xunta de Galicia remata os trámites da súa competencia dentro do procedemento de reversión dos terreos incluídos na primeira fase. O Goberno de España, decidirá agora sobre esta proposta conxunta de reversión de terreos nos dez portos.

Segunda fase

Unha vez rematada a tramitación autonómica respecto dos terreos dos portos incluídos na primeira fase deste procedemento, Portos de Galicia está a traballar xa para consensuar a delimitación do solo que reclaman outros concellos e replicar o procedemento. Con este traballo, o ente público dá resposta á solicitude de 26 de municipios que pretender asumir a titularidade de zonas de uso público que ata o momento pertencen a Portos de Galicia, segundo se acordou coa Fegamp.