Permitídeme en primeiro lugar mostrar a miña profunda honra por este nomeamento como presidente de Portos de Galicia e o meu sincero agradecemento ao conselleiro do Mar, Alfonso Villares, e ao presidente da Xunta de Galicia, Alfonso Rueda, pola confianza que depositan en min para sacar adiante este reto, igual de esixente que ilusionante.

Tamén o meu recoñecemento aos meus antecesores polo traballo realizado, pola súa entrega profesional e institucional e polo compromiso persoal tanto co mar de Galicia como co sistema portuario, fundamental para a economía de Galicia. Un compromiso do que eu tomo hoxe a testemuña e que ratifico novamente.

Asumo a presidencia de Portos de Galicia comprometéndome a poñer todo o meu esforzo e experiencia na Administración pública a disposición das mulleres e os homes do mar, para seguir facendo dos portos galegos un lugar de traballo eficiente, seguro, innovador e respectuoso coa contorna, que conquiste aos galegos do futuro para garantir a remuda xeracional no mar. Comprometo o meu traballo a prol do sector profesional, comercial, da náutica de recreo, do impulso ao tránsito de pasaxeiros por mar e da mellor integración entre os nosos portos e as vilas que os acollen. E fíxome como obxectivo estrutural que os portos sexan espazos de encontro dos intereses de todas e todos e o corazón da Galicia mariñeira.

Só me queda mostrar a miña satisfacción por incorporarme a un equipo de traballo como o de Portos de Galicia e a Consellería do Mar, conformado por profesionais que levan décadas amosando a súa valía para mellorar a vida da Galicia costeira. Un equipo que ama Galicia e ama o mar, polo que é unha honra unirme a esta travesía.

José Antonio Álvarez Vidal

Presidente da Entidade Pública Empresarial Portos de Galicia

Consellería do Mar