Volver ao contido

Publicador de contidos

Atrás

Portos de Galicia inviste preto dun millón de euros na renovación e mellora dos pantaláns para profesionais do porto da Pobra do Caramiñal

  • A presidenta de Portos de Galicia visitou os traballos que están xa en execución coa substitución do pavimento por madeira tecnolóxica e incluirán, entre outras actuacións, a dotación de novos fingers para ampliar o tamaño das prazas de amarre.

 

A Pobra do Caramiñal (A Coruña), 16 de marzo de 2021.- A Consellería do Mar, a través de Portos de Galicia, está a investir 940.000 euros nas obras de renovación e mellora dos pantaláns para profesionais do porto da Pobra do Caramiñal. A presidenta do ente público, Susana Lenguas, visitou esta mañá os traballos, que se atopan en execución.

Esta actuación enmárcase nun contrato conxunto para os portos da Pobra, Rianxo e Sada, por importe de 2 millóns de euros. O obxecto das obras proxectadas é a modernización das instalacións aboiantes mellorando a seguridade e accesibilidade ás embarcacións, ademais de optimizar a utilización das augas abrigadas.

Polo que respecta ao porto da Pobra do Caramiñal, actualmente estase procedendo á renovación integral do pavimento dos pantaláns pesqueiros e mexilloeiros e da pasarela, substituíndo o existente por outro de madeira tecnolóxica, de maior duración e resistencia. Os traballos suporán deixar habilitadas arredor de 180 prazas de amarre trala instalación de fingers de maior tamaño co obxectivo de crear prazas de maiores dimensións, máis axeitadas para a frota que opera actualmente nestas instalacións.

As obras previstas inclúen tamén a retirada do tren de fondeos, saneamento dos pilotes e subministro de escaleiras abatibles e balizas para a punta dos pantaláns. Finalmente dotarase aos pantaláns de sistema de apertura por móbil e poranse en funcionamento as torretas de auga e enerxía eléctrica.

 

Máis de 200.000 euros en Rianxo

Durante a súa visita á Pobra do Caramiñal, a presidenta de Portos de Galicia informou tamén da evolución dos traballos no porto de Rianxo. Neste caso, as obras están tamén en execución cun orzamento de 200.000 euros. A actuación pasa por ampliar lixeiramente os pantaláns pesqueiros para a instalación de máis de 70 novos fingers habilitando arredor de 150 prazas e eliminando o tren de fondeo. Ademais renovarase integralmente o pavimento aplicando madeira tecnolóxica nos pantaláns e na pasarela, instalaranse escaleiras abatibles e unha baliza ao final da estrutura así como un sistema de apertura das portas co móbil. Finalmente limparanse os flotadores e sanearanse os pilotes.