Volver ao contido

Publicador de contidos

Volver á páxina Índice
Atrás

Portos de Galicia lembra que a mobilidade de peregrinos por mar entre Portugal e A Guarda está garantida

  • A presidenta de Portos de Galicia e a directora xeral de Turismo visitaron as instalacións do peirao da Pasaxe onde a Xunta habilitou un transporte de pasaxeiros a través de dúas embarcacións

Vigo, 18 de maio de 2022.- A presidenta de Portos de Galicia, Susana Lenguas, e a directora xeral de Turismo de Galicia, Nava Castro, visitaron esta semana as instalacións de transporte de pasaxeiros do porto da Pasaxe-Camposancos, no municipio da Guarda para comprobar o funcionamento dos servizos de transporte de pasaxeiros nesta zona fronteiriza con Portugal. Ambas representantes do Executivo autonómico lembraron que a mobilidade de peregrinos por mar entre Portugal e A Guarda está absolutamente garantida como corresponde ás necesidades turísticas do Camiño de Santiago.

A presidenta de Portos de Galicia lembrou que o ente público requiriu ao Concello da Guarda a documentación necesaria para autorizar o servizo do ferri entre Portugal e a Guarda, sen ter polo de agora resposta da administración local. Ademais, para contribuír a facilitar a mobilidade dos peregrinos neste Xacobeo, a Xunta de Galicia habilitou o Xacobeo transfer, un servizo de transporte dos camiñantes entre ambas beiras da desembocadura do Miño a través de dúas embarcacións. Deste xeito, subsánase a falta de servizo derivada da decisión da empresa portuguesa titular do ferri de paralizalo despois de que o barco sufrise unha avaría meses atrás.

Susana Lenguas lembrou tamén os problemas de calado existentes no trazado entre Camiña e España que condicionan o servizo do ferri ás mareas polas características da embarcación. A este respecto subliñou que esta zona pertence a Rede Natura, o que dificultaría considerablemente promover e tramitar unha potencial dragaxe e sucesivas de mantemento. Ademais, o problema de calado afecta tanto a solo español, de titularidade do Estado, como portugués. Non en van, foi o Goberno central o responsable da última dragaxe executada no ano 2009.