Volver ao contido

Publicador de contidos

Atrás

Galicia alerta de que o estado pon en risco o futuro de empresas do mar e doutras edificacións asentadas nos portos autonómicos ao interferir nas competencias exclusivas da comunidade

  • A Xunta e o sector mostran a súa preocupación ante o informe emitido polo Goberno central sobre o plan especial de Cambados pois cuestiona a presenza en terreos portuarios de actividades tradicionalmente permitidas como a acuicultura e a depuración de produtos do mar.
  • A conselleira destaca que todo apunta a un novo ataque do Ministerio para a Transición Ecolóxica contra o complexo mar-industria de Galicia dado que a resolución de Costas semella invadir as competencias exclusivas que a comunidade ten na xestión dos peiraos autonómicos ao pretender aplicarlle a Lei de Costas.
  • O Executivo galego lamenta que a actuación da Administración central neste caso é semellante á mantida sobre a instalación dunha planta de cría de salmón en Burela, sobre a que rexeitaba a súa autorización arrogándose competencias que non son súas.
  • Rosa Quintana censurou a actitude do Executivo estatal por querer retirar do litoral boa parte das edificacións asentadas nel e lembrou que a Xunta leva alertando desde hai máis de tres anos de que están en risco un cento de empresas do complexo mar-industria e outros 4.000 inmobles con fins sociais da comunidade.

Santiago de Compostela, 22 de abril de 2022.- A conselleira do Mar, Rosa Quintana, mantivo hoxe un encontro con representantes da Confederación Mar-Industria Alimentaria de Galicia no que analizou a situación do sector ante as decisións que está a adoptar Costas do Estado en relación coas instalacións asentadas no litoral e que poñen en risco o futuro de moitas empresas. As partes mostraron a súa preocupación polo último informe emitido polo Goberno central neste sentido -sobre o plan especial de Cambados- que cuestiona a presenza en terreos portuarios de actividades tradicionalmente permitidas como a acuicultura ou a depuración de produtos do mar así como doutras edificacións como prazas de abastos, centros de saúde ou colexios.

A titular de Mar denunciou que este informe semella un novo ataque ao complexo mar-industria de Galicia pois parece invadir competencias da comunidade, algo que cualificou de totalmente inaceptable e desleal. A representante da Xunta incidiu en que as decisións adoptadas polo Executivo do Estado xeran inseguridade xurídica no sector dado que fan unha interpretación restritiva da normativa vixente sobre as zonas portuarias malia que non houbo ningún cambio normativo nos últimos anos. Ademais pretende aplicar a Lei de Costas nos peiraos autonómicos, o que suporía invadir competencias ao interferir na xestión e explotación dos servizos portuarios, algo de competencia exclusiva da comunidade autónoma.

“A Galicia correspóndelle a utilización, explotación e xestión do dominio público nos peiraos autonómicos, tal como establecen a Constitución, o real decreto de transferencias do ano 1982 e a Lei de Portos de Galicia, e este informe parece querer usurpar esas competencias”, aseverou a conselleira do Mar. O proceder do Estado neste caso, incidiu, é semellante ao mostrado hai unhas semanas cun informe sobre a instalación dunha planta de cría de salmón en Burela, no que rexeitaba a súa autorización arrogándose competencias que non son súas.

A representante do Executivo galego -que estivo acompañada polas secretarias xerais técnicas da Consellería de Medio Ambiente, Territorio e Vivenda, Carmen Bouso, e do Mar, Silvia Cortiñas, así como pola presidenta de Portos de Galicia, Susana Lenguas- lamentou que a actuación do Goberno do Estado neste caso vai na liña do ataque continuado e inxustificado iniciado hai varios anos polo Ministerio para a Transición Ecolóxica e Reto Demográfico contra Galicia e o seu complexo mar-industria.

Neste sentido, a titular de Mar alertou aos representantes do sector de que semella que Costas do Estado avanza na súa intención de retirar do litoral boa parte das edificacións asentadas nel, xa non só no dominio público marítimo-terrestre natural senón tamén no portuario.

En risco

Rosa Quintana lembrou que a comunidade leva máis de tres anos denunciando que os plans do Executivo central -con estas interpretacións restritivas e exaxeradas da normativa, coa nova Lei de Cambio Climático e coa modificación do regulamento xeral de Costas- poñen en risco máis dun cento de empresas asentadas na liña de costa e outras 4.000 edificacións entre as que se inclúen centros de saúde ou colexios.

Por iso, a conselleira trasladoulle á Confederación Mar-Industria Alimentaria o seu compromiso de seguir defendendo os intereses do sector e do conxunto de Galicia ante todas as instancias. Nesta liña, recordou que a Xunta xa recorreu ante o Tribunal Constitucional a Lei de Cambio Climático -unha vez que fracasou a Comisión Bilateral co Estado-, unha norma que o Goberno central se viu obrigado a modificar antes da súa aprobación definitiva como consecuencia dun informe do Consello Consultivo de Galicia que concluía que algún dos seus artigos era inconstitucional.

A representante do Executivo galego destacou que este asunto é vital para a comunidade pois está en perigo o futuro de instalacións do sector marítimo-pesqueiro fundamentais para a economía galega e tamén outras edificacións sociais vitais para o conxunto da cidadanía.